រដ្ឋមន្រ្ដីក្រសួងអភិវឌ្ឍន៍ជនបទ បានជួបជាមួយ លោកស្រីនាយិកាធនាគារអភិវឌ្ឍន៍អាស៊ី ប្រចាំនៅកម្ពុជា
ភ្នំពេញៈ
ដោយ៖ ហុង ចំណាប់
កាលពីរសៀលថ្ងៃទី៣១ ខែមករា ឆ្នាំ២០១៩ រដ្ឋមន្រ្ដីក្រសួងអភិវឌ្ឍន៍ជនបទ បានសម្ដែងការគួរសម និងពិភាក្សាការងារជាមួយ
លោកស្រី Sunniya
Durrani Jamal នាយិកាធនាគារអភិវឌ្ឍន៍អាស៊ី
ប្រចាំនៅកម្ពុជា នៅទីស្ដីការក្រសួងអភិវឌ្ឍន៍ជនបទ។
ធនាគាអភិវឌ្ឍន៍អាស៊ី (ADB) នឹងបន្តជួយគាំទ្ររាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ លើវិស័យផ្គត់ផ្គង់ទឹកស្អាត
សុខភាព អនាម័យ និងហេដ្ឋារចនាសម្ព័ន្ធគមនាគមន៍ ជាដើម។
លោករដ្ឋមន្ត្រី
ក្រសួងអភិវឌ្ឍន៍ជនបទ បានជម្រាបជូនភ្ញៀវអំពីវឌ្ឍនភាព
និងសមិទ្ធផលរបស់ក្រសួង អភិវឌ្ឍន៍ជនបទ ដែលសម្រេចបានក្នុងរយៈពេល ៥ឆ្នាំកន្លងមក ដែលក្នុងនោះមានធនាគារអភិវឌ្ឍន៍
អាស៊ី បានរួមចំណែកជាមួយ រាជរដ្ឋាភិបាលកម្ពុជា ហើយកំពុងប្រែក្លាយពីប្រទេសដែលមានចំណូលទាប មកជាប្រទេសដែលមានចំណូលមធ្យមកម្រិតទាប។
លោករដ្ឋមន្ត្រី បានបន្តទៀតថា សម្រាប់អាណត្តិថ្មី ២០១៨-២០២៣
រាជរដ្ឋាភិបាលបានដាក់ចេញ នូវ យុទ្ធសាស្រ្ដចតុកោណដំណាក់កាលទី៤
ដោយឡែកក្រសួងអភិវឌ្ឍន៍ជនបទ ក៏បានរៀបចំយុទ្ធសាស្រ្ដអភិវឌ្ឍន៍ជនបទ មានរយៈពេល៥ឆ្នាំផងដែរ
ដើម្បីរួមចំណែកជាមួយរាជរដ្ឋាភិបាល ក្នុងការកាត់បន្ថយ ភាពក្រីក្រដោយផ្ដោតទៅលើវិស័យសំខាន់ៗចំនួន៤
គឺ ទី១ ការកសាងហេដ្ឋារចនាសម្ព័ន្ធរូបវ័ន្ត ទី២ ការអប់រំលើកកម្ពស់សុខុមាលភាពប្រជាពលរដ្ឋនៅតាមតំបន់ជនបទ
ទី៣ ការបង្កើតឱកាសកាងារ ឬមុខរបរផ្សេងៗតាមរយៈការបណ្ដុះបណ្ដាលមុខវិជ្ជាជីវ ដល់ប្រជាពលរដ្ឋក្រីក្រតាមជនបទ
និងទី៤ ការពង្រឹងស្ថាប័ន និងអភិវឌ្ឍន៍ធនធានមនុស្ស ដើម្បីលើកស្ទួយផ្នែកសេដ្ឋកិច្ច
សង្គមកិច្ច និងការស្ថាបនាផ្លូវតភ្ជាប់ពីតំបន់ដាច់ស្រយាលទៅទីប្រជុំជន ទីផ្សារ
និងតំបន់ដែលទទួលសេវាសាធារណៈ។
នៅតាមបណ្ដាភូមិទូទាំងប្រទេសមានផ្លូវស្ទើរតែទាំងអស់ តែផ្លូវទាំងនោះជាផ្លូវដីស
និងផ្លូវក្រាលក្រួសក្រហម ដែលធ្វើឲ្យប៉ះពាល់សុខភាពរបស់ប្រជាពលរដ្ឋ ដូចនេះសុំឲ្យធនាគារអភិវឌ្ឍន៍អាស៊ី
ជួយពង្រីកហិរញ្ញប្បទានបន្ថែមទៀត សម្រាប់កសាងហេដ្ឋារចនាសម្ព័ន្ធរូបវ័ន្ត ដែលមានភាពធន់ទៅនឹងការបម្រែ
បម្រួលអាកាសធាតុ ។
លោកស្រី Sunniya
Durrani Jamal បានថ្លែងអំណរគុណចំពោះក្រសួងអភិវឌ្ឍន៍ជនបទ ដែលតែង តែផ្ដល់នូវកិច្ចសហប្រតិបត្តិការល្អ
ជាមួយធនាគារអភិវឌ្ឍន៍អាស៊ីនាពេលកន្លងមក ហើយលោកស្រី មានការរីករាយខ្លាំងណាស់ចំពោះលទ្ធផលជា
ផ្កាផ្លែទាំងនេះ។ លោកស្រី បានបញ្ជាក់ថា យុទ្ធសាស្រ្ដគាំទ្រប្រទេសរបស់ធនាគារអភិវឌ្ឍន៍អាស៊ី
គឺផ្ដោតទៅលើការអភិវឌ្ឍន៍មានភាពបៃតង មាននិរន្ដរភាព និងមានភាពធន់ទៅនឹងការប្រែប្រួលអាកាសធាតុ
និងយកចិត្តទុកដាក់ទៅលើការកសាងហេដ្ឋារចនាសម្ព័ន្ធ ដោយ តភ្ជាប់ទីប្រជុំជន
និងតំបន់ដាច់ស្រយាលផងដែរ។ ធនាគារអភិវឌ្ឍន៍អាស៊ី នឹងរងចាំនូវសំណើររបស់ក្រសួងអភិវឌ្ឍន៍ជនបទ
ដើម្បីពិនិត្យលទ្ធភាព និងបន្តគាំទ្រ ។
លោករដ្ឋមន្រ្ដី បានថ្លែងអំណរគុណយ៉ាងជ្រាលជ្រៅ ជូនចំពោះធនាគារអភិវឌ្ឍន៍អាស៊ី ដែលតែងតែជួយគាំទ្រ
និងបន្តកិច្ចសហប្រតិបត្តិការល្អជាមួយរាជរដ្ឋាភិបាលកម្ពុជា ជាពិសេស ជាមួយក្រសួងអភិវឌ្ឍន៍
ជនបទ ដែលជាការរួមចំណែកកាត់បន្ថយភាពក្រីក្រ របស់ប្រជាពលរដ្ឋនៅជនបទ ស្រមតាមគោលនយោបាយ
និងយុទ្ធសាស្រ្ដចតុកោណដំណាក់កាលទី៤ របស់រាជរដ្ឋាភិបាលកម្ពុជា៕
Post a Comment