សន្និបាតបូកសរុបលទ្ធផលការងារឆ្នាំ២០១៨ និងបន្តការងារឆ្នាំ២០១៩ របស់ក្រសួងអភិវឌ្ឍន៍ជនបទ
ដោយ៖ ហុង ចំណាប់
ដោយសារការអនុវត្ត យុទ្ធសាស្ត្រចតុកោណ ដំណាក់កាលទី៣ និងផែនការយុទ្ធសាស្ត្រអភិវឌ្ឍន៍ជាតិ ២០១៤-២០១៨ របស់រាជរដ្ឋាភិបាលនីតិកាលទី៥ នៃរដ្ឋសភា បានធ្វើឲ្យស្ថានភាព និងកម្រិតជីវភាពរបស់ប្រជាជនកម្ពុជា មានភាពសុខដុម ប្រសើឡើងជាលំដាប់ ជាមួយ ការអភិវឌ្ឍសេដ្ឋកិច្ចក្នុងសន្ទុះ ដ៏លឿន ពិសេស គឺការសម្រេចបាននូវកំណើនសេដ្ឋកិច្ចខ្ពស់ និងការកាត់បន្ថយភាពក្រីក្ររបស់ប្រជាជនបានឆាប់រហ័ស។
ក្រសួងអភិវឌ្ឍន៍ជនបទ ក៏បានសម្រេចបេសកម្មដ៏ថ្លៃថ្លារបស់ខ្លួន ក្នុងការចូលរួចចំណែកជាមួយរាជរដ្ឋាភិបាល តាមរយៈការពង្រឹងស្ថាប័ន ការកសាងសមត្ថភាព និងការអភិវឌ្ឍធនធានមនុស្ស ការស្ថាបនាជួសជុលហេដ្ឋារចនាសម្ព័នរូបវ័ន្តគមនាគមន៍ និងសេវាសាធារណៈ ការលើកកម្ពស់សុខភាព ការអប់រំ ការបង្កើតការងារ មុខរបរសហគ្រិនភាព និងសកម្មភាពសេដ្ឋកិច្ចនៅជនបទច្រើនទៀត ប្រកបដោយប្រសិទ្ធភាពក្នុងការអភិវឌ្ឍន៍ និងពង្រឹងសេដ្ឋកិច្ចកម្ពុជា ដើម្បីជំរុញបន្តសមាហរណកម្មខ្លួនចូលក្នុងសេដ្ឋកិច្ចតំបន់ និងពិភពលោក។
ក្រសួងអភិវឌ្ឍន៍ជនបទ បានដើរតួរនាទីដ៏សំខាន់ក្នុងការសម្រេចបាន នូវសមិទ្ធផលធំៗជាច្រើន ដូចជា (១) បានយកចិត្តទុកដាក់ពង្រីកសកម្មភាពផ្គត់ផ្គង់ទឹក ស្អាត និងអនាម័យជនបទ នៅឆ្នាំ២០២៥ ប្រជា ជន នៅជនបទគ្រប់រូបត្រូវមានការផ្គត់ផ្គង់ទឹកស្អាត និងអនាម័យគ្រប់គ្រាន់ និងរស់នៅក្នុងបរិស្ថានដែលមានអនាម័យ ប្រកបដោយនិរន្តរភាព (២) ធ្វើឲ្យប្រសើរឡើងនូវបណ្តាញផ្លូវជនបទគ្រប់ប្រភេទ ដើម្បីតភ្ជាប់រវាងតំបន់នានានៅជនបទ ទៅជាប្រព័ន្ធគមនាគមន៍ដឹកជញ្ជូន ដ៏ងាយស្រួល ជូនប្រជាពលរដ្ឋ ពិសេស ក្នុងការចូលរួមចំណែកលើកកម្ពស់សេដ្ឋកិច្ចគ្រួសារ ឲ្យកាន់តែមានភាពប្រសើរឡើង (៣) ធ្វើប្រតិភូកកម្មមុខងារជូនរាជរដ្ឋាភិបាល ស្រុកចំនួន២០ ក្នុងខេត្តគោដៅចំនួន៤ ដើម្បីគ្រប់គ្រង ចាត់ចែង និងអនុវត្តន៍សាកល្បងសម្រាប់រយៈពេលពីរឆ្នាំ នូវសកម្មភាពសំខាន់ៗចំនួន៣ របស់ក្រសួងអភិវឌ្ឍន៍ជនបទ រួមមាន៖ ការងារថែទាំផ្លូវជនបទជាលក្ខណៈប្រចាំ ការងារជួសជុលនឹងថែទាំប្រព័ន្ធផ្គត់ផ្គង់ទឹកជនបទ និងការលើកកម្ពស់សេវាអនាម័យជនបទ (៤) បង្កើនសន្តិសុខស្បៀងគ្រួសារ តាមរយៈការប្រមូលផ្តុំ និងបណ្តុះបណ្តាលស្ត្រី ស្តីអំពីការផលិតស្បៀងជាលក្ខណៈគ្រួសារ ការទុកដាក់ និងថែរក្សាស្បៀង ការកែច្នៃស្បៀងដើម្បីឲ្យមានជាតិអាហាររូបត្ថម្ភ និងការដាំដំណាំរួមផ្សំសម្រាប់គ្រួសារ (៥) បានពង្រឹង និងពង្រីកការផ្តល់ឥណទានខ្នាតតូច ដល់ប្រជាពលរដ្ឋជនបទ ឲ្យមានលទ្ធភាពក្នុងការបង្កើតមុខរបរខ្នាតតូច ជា លក្ខណៈគ្រួសារសម្រាប់បង្កើតប្រាក់ចំណូលបន្ថែម ដើម្បីធ្វើឲ្យសេដ្ឋកិច្ចគ្រួសារ កាន់តែមានភាពប្រសើរឡើង និងកាត់បន្ថយការធ្វើចំណាកស្រុក (៦) លើកស្ទួយសមភាពយេនឌ័រនៅថ្នាក់ជាតិ និងថ្នាក់ក្រោមជាតិតាមរយៈការផ្សព្វផ្សាយ និងការបញ្ជ្រាបអំពីសិទ្ធិរបស់ស្ត្រី ដល់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ របស់ក្រសួងអភិវឌ្ឍន៍ជនបទ និងបានធ្វើការបញ្ជ្រាបអំពីសិទ្ធិរបស់ស្ត្រីដល់សហគមន៍ជនបទ តាមរយៈការជំរុញការអនុវត្តកម្មវិធីអភិវឌ្ឍន៍ជនបទ ការបណ្តុះបណ្តាល និងការបង្កើតឱកាសក្នុងការរកប្រាក់ចំណូលបន្ថែមសម្រាប់គ្រួសារ តាមរយៈការបង្កើតមុខរបរខ្នាត់តូច និងការអប់រំអនាម័យដើម្បីសុខភាព (៧) បណ្តុះបណ្តាលដល់មន្ត្រីរាជការនៅថ្នាក់ក្រសួង និងថ្នាក់មន្ទីរអភិវឌ្ឍន៍ជនបទរាជធានី ខេត្ត លើការដឹកនាំ គ្រប់គ្រង និងជំនាញឲ្យកាន់តែមានសមត្ថភាពបន្ថែមទៀត (៨) គាំទ្រការរៀបចំ និងពង្រឹងសមត្ថភាពគណៈកម្មាធិការអភិវឌ្ឍភូមិ (គ.អ.ភ) ដែលជារចនាសម្ព័ន្ធមូលដ្ឋាន ក្នុងការជួយដឹកនាំ និងសម្របសម្រួលកម្មវិធីអភិវឌ្ឍន៍ជនបទ ឲ្យមានភាពល្អប្រសើឡើង។ (៩) ពង្រឹង និងពង្រីកកិច្ចសហប្រតិបត្តិការល្អ ជាមួយស្ថាប័នពាក់ព័ន្ធគ្រប់លំដាប់ថ្នាក់ជាមួយដៃគូអភិវឌ្ឍន៍ អង្គការក្រៅរដ្ឋាភិបាល ព្រមទាំងវិស័យឯកជន ដើម្បីបង្កើនប្រសិទ្ធភាពលើការអនុវត្តកម្មវិធីអភិវឌ្ឍន៍ជនបទ និងការកាត់បន្ថយភាពក្រីក្រ អោយកាន់តែមានភាពសុក្រិតនិងរលូនថែមទៀត។
ក្រោមការដឹកនាំ របស់សម្តេច ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបាន និងកំពុងធ្វើសមាហរណកម្មសេដ្ឋកិច្ច កម្ពុជាចូលក្នុងសេដ្ឋកិច្ចតំបន់ និងពិភពលោកនាំមកនូវកិត្តិយស និងសេចក្តីថ្លៃថ្នូរជូនជាតិមាតុភូមិ ពិសេសកំពុងប្រែក្លាយប្រទេសកម្ពុជា ពីប្រទេសក្រីក្រ មកជាប្រទេសមានផលចំនូលមធ្យមកម្រិតទាប និងឈានទៅជាប្រទេសមានផលចំណូលមធ្យមកម្រិតខ្ពស់ នៅឆ្នាំ២០៣០។
ដោយការយកចិត្តទុកដាក់របស់រាជរដ្ឋាភិបាល ក្នុងការផ្តល់ថវិការជាតិ នូវមានកម្រិតសម្រាប់ការអនុវត្ត ប្រទេសកម្ពុជាមានគាំទ្រយ៉ាងច្រើនពីសំណាក់ ដៃគូរអភិវឌ្ឍន៍ អង្គការរជាតិ និងអន្តរជាតិ ក្នុងរូបភាពផ្តល់ជាជំនួយបច្ចេកទេស ជំនួយហិរញ្ញប្បទានឥតសំណង និងហិរញ្ញប្បទានសម្បទានផងដែរ។
ក្រសួងអភិវឌ្ឍន៍ជនបទ ទាំងនៅថ្នាក់ជាតិ និងថ្នាក់ក្រោមជាតិ បានធ្វើការត្រួតពិនិត្យ និងវាយតម្លៃសមិទ្ធិផល និងបញ្ហាប្រឈមផ្សេងៗ នៅក្នុងមូលដ្ឋាន និងការជំរុញអនុវត្តន៍បន្តនូវកម្មវិធីកែទម្រង់នានា ដែលត្រូវបានកំណត់នៅក្នុងកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលនីតិកាលទី៦ នៃរដ្ឋសភា ដើម្បីកំណើនការងារ សមធម៌ និងប្រសិទ្ធភាព និងកសាងមូលដ្ឋានឆ្ពោះ ទៅសម្រេចចក្ខុវិស័យកម្ពុជាឆ្នាំ២០៥០ បន្ទាប់ពីកម្ពុជាបានរៀបចំបោះឆ្នោត ជ្រើសរើសតំណាងរាស្ត្រ ប្រកបដោយជោគជ័យកាលពីខែកក្កដា ឆ្នាំ២០១៨ ស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា និងលទ្ធិប្រជាធិបតេយ្យ សេរីពហុបក្ស។
ដើម្បីចូលរួមចំណែក ក្នុងការអនុវត្តនូវយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល សម្រាប់នីតិកាលទី៦ នៃរដ្ឋសភា ទទួលបានជោគជ័យ ក្រសួងអភិវឌ្ឍន៍ជនបទបាន នឹងកំពុងសម្រួចទិសដៅជាយុទ្ធសាស្ត្ររបស់ខ្លួន ពិសេសសម្រាប់ទិសដៅការងារឆ្នាំ២០១៩ ដែលបានផ្តោតសំខាន់ លើយុទ្ធសាស្ត្រជាអទិភាពមួយចំនួន រួមមាន៖ (១) ការពង្រឹងស្ថាប័ន ការកសាងសមត្ថភាព និងការអភិវឌ្ឍន៍ធនធានមនុស្ស (២) ការស្ថាបនា កសាង និងជួសជុល លើកម្រិតហេដ្ឋារចនាសម្ព័ន្ធរូបវ័ន្ត គមនាគមន៍ និងសាធារណៈ (៣) ការលើកកម្ពស់សុខភាព ការអប់រំ និងលក្ខខណ្ឌនៃការរស់នៅ និង (៤) ការបង្កើតការងារ មុខរបរ សហគ្រិនភាព និងសកម្មភាពសេដ្ឋកិច្ច ជាដើម៕
Post a Comment