គណៈកម្មាការជាតិរៀបចំការបោះឆ្នោត គ.ជ.ប បានរៀបចំពិធីត្រួតពិនិត្យមើលដំណើរការបោះពុម្ពសន្លឹកឆ្នោតសម្រាប់បោះឆ្នោតឃុំ សង្កាត់ អាណត្តិទី៥ ឆ្នាំ២០២២ ដែលមានការចូលរួមពី គណបក្សនយោបាយ អង្គការ សមាគម និងអ្នកសារព័ត៌មាន
ភ្នំពេញ
ដោយៈ ហុង ចំណាប់
នៅថ្ងៃទី៦ ខែឧសភា ឆ្នាំ២០២២ វេលាម៉ោង ៩:០០នាទី ឯកឧត្តម ប្រាជ្ញ ចន្ទ ប្រធានគណៈកម្មាការជាតិរៀបចំការបោះឆ្នោត គ.ជ.ប បានអញ្ជើញទៅពិនិត្យមើលដំណើរ ការបោះពុម្ពសន្លឹកឆ្នោត សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នៅរោងពុម្ព ណាវីន ព្រីនធីង ឯ.ក ស្ថិតនៅផ្ទះលេខ៩ ផ្លូវលេខ ៣៤៥ សង្កាត់បឹងកក់ទី១ ខណ្ឌទួលគោក រាជធានីភ្នំពេញ។
ការពិនិត្យមើលដំណើរការបោះពុម្ពសន្លឹកឆ្នោតនេះ មានតំណាងគណបក្សនយោបាយចំនួន ៨ ដែលបាន ចូលរួមពិនិត្យ និងសង្កេតមើលចង្វាក់នៃការបោះពុម្ពសន្លឹក ឆ្នោតនៅរោងពុម្ព រួមមាន គណបក្សប្រជាជន គណបក្សហ្វ៊ុនស៊ិនប៉ិច គណបក្សស្រឡាញ់ជាតិ គណបក្សសញ្ជាតិកម្ពុជា គណបក្សយុវជនកម្ពុជា គណ បក្សឆន្ទៈខ្មែរ គណបក្សកម្ពុជានិយម គណបក្សរស្មីខេមរា និងតំណាងអង្គការ សមាគម ចំនួន ៩ ព្រមទាំង អ្នកសារព័ត៌មានជាច្រើនអង្គភាព សរុបប្រមាណ ៤០នាក់ទៀត។
ឯកឧត្តម ប្រាជ្ញចន្ទ ប្រធាន គ.ជ.ប បានមានប្រសាសន៍ថា ថ្ងៃនេះ គ.ជ.ប បានអញ្ជើញគ្រប់ភាគីពាក់ព័ន្ធនឹងការបោះឆ្នោតទាំងអស់ មកពិនិត្យ និងសង្កេតមើលដំណើរការ បោះពុម្ពសន្លឹកឆ្នោតផ្ទាល់តែម្តង។ ឯកឧត្តម មានប្រសាសន៍បន្តថា ដូចគ្នានឹងការបោះឆ្នោត កន្លងមក គឺ គ.ជ.ប តែងតែអញ្ជើញគ្រប់គណបក្ស នយោបាយ អ្នកអង្កេតការណ៍ និងអ្នកសារព័ត៌មាន មកពិនិត្យ និងសង្កេតមើលដំណើរការបោះពុម្ពសន្លឹកឆ្នោត ដល់ទីកន្លែងផ្ទាល់តែម្តង។ ឯកឧត្តម ប្រធានគ.ជ.ប បានមានប្រសាសន៍ទៀតថា ដំណើរការបោះពុម្ពសន្លឹកឆ្នោតនាពេលនេះ នៅសល់តែ៣ខេត្តទៀតទេនឹងត្រូវបញ្ចប់ ហើយត្រូវវេចខ្ចប់យកទៅរក្សាទុក នៅកន្លែងមានសុវត្ថិភាព សម្រាប់បញ្ជូនទៅឱ្យ គណៈកម្មការាជធានី ខេត្តរៀបចំការបោះឆ្នោត គឃ.ខប ដើម្បីចាត់ចែងបញ្ជូនទៅគណៈកម្មការឃុំ សង្កាត់រៀបចំការបោះឆ្នោត គឃ.សប នឹងបន្តទៅគណៈកម្មកា រការិយាល័យបោះឆ្នោត គ.ក.ប មិនឱ្យហួសពី ៣៦ម៉ោង មុនថ្ងៃបោះឆ្នោត នាថ្ងៃទី៥ ខែមិថុនា ឆ្នាំ២០២២។
បន្ទាប់ពីភាគីពាក់ព័ន្ធនឹងការបោះឆ្នោតទាំងអស់ បានពិនិត្យសង្វាក់ផលិតកម្មនៃការបោះពុម្ពសន្លឹកឆ្នោត រួចមក ឯកឧត្តម ហង្ស ពុទ្ធា សមាជិក គ.ជ.ប និងជាប្រធានក្រុម អ្នកនាំពាក្យ គ.ជ.ប បានជម្រាបជូនអ្នក សារព័ត៌មានថា សន្លឹកឆ្នោតត្រូវបានបោះពុម្ព ចំនួន ១.៦៥២ ប្រភេទ ស្មើនឹងចំនួន ១.៦៥២ ឃុំ សង្កាត់ ពីព្រោះថា ឃុំ សង្កាត់ នីមួយៗមានចំនួនគណបក្សនយោបាយឈរឈ្មោះបោះឆ្នោតមិនដូគ្នាទេ។ គណបក្សនយោបាយឈរឈ្មោះបោះឆ្នោត មាន១៧ គណបក្ស។ ក្នុងចំណោម ១៧ គណបក្សនេះ គណបក្សខ្លះចុះបញ្ជីបេក្ខជនជាង ១.៦០០ ឃុំ សង្កាត់គណបក្សខ្លះចុះបញ្ជីបេក្ខជនមិនដល់ ១.០០០ ឃុំ សង្កាត់ទេ។ ដូច្នេះហើយសន្លឹកឆ្នោតមានប្រភេទ ខុសៗគ្នា អាស្រាយតាមចំនួនគណបក្សនយោបាយ ដែលបានចុះបញ្ជីបេក្ខជនឈរឈ្មោះឆ្នោត និងតាមលទ្ធផលនៃការចាប់ឆ្នោតកំណត់លំដាប់ លេខរៀងគណបក្ស នយោបាយ ដាក់លើសន្លឹកឆ្នោត។
ឯកឧត្តម ហង្ស ពុទ្ធា បានជម្រាបជូនបន្តទៀតថា អ្នកមានឈ្មោះក្នុងបញ្ជីបោះឆ្នោតផ្លូវការមានចំនួន៩.២០៥.៦៨១ នាក់ ចំនួនការិល័យបោះឆ្នោត មាន ២៣.៦០២ ការិយាល័យ ហើយសន្លឹកឆ្នោត ត្រូវបោះពុម្ពមានប្រមាណ ១១លានសន្លឹក រួមនឹងសន្លឹកឆ្នោតបម្រុងប្រមាណ ១លានសន្លឹក។ សន្លឹកឆ្នោតត្រូវបានបោះពុម្ព ចងក្រង ជាក្បាល ដោយក្នុង ១ក្បាល មានចំនួន ៥០សន្លឹក។ ហើយសន្លឹកឆ្នោត ដែលបោះពុម្ពនេះ មានលក្ខណៈ ពិសេសនិងមានភាពសម្ងាត់ ដែលគ្មានជនណាម្នាក់អាចយក ទៅបោះពុម្ពក្លែងបន្លំបានឡើយ ហើយក្រុម ហ៊ុនដែលដេញថ្លៃបានតាមនីតិវិធីហិរញ្ញវត្ថុ ត្រូវធានាសុវត្ថិភាពចំពោះ គ.ជ.ប ក្នុងការបោះពុម្ពសន្លឹកឆ្នោត។
https://kronglungvek.com.kh
Post a Comment