សម្តេចតេជោ ហ៊ុន សែន បានថ្លែងថា បើកូនសម្តេចមិនល្អ គឺមិនឱ្យធ្វើ​នាយករដ្ឋមន្ត្រីនោះឡើយ សម្តេចមិនឱ្យគណបក្សប្រជាជនកម្ពុជា ត្រូវ​បំផ្លាញដោយដៃកូនរបស់សម្តេចនោះទេ

ដោយៈ សេង ស៊ីដារ៉ូ

សម្តេចតេជោ ហ៊ុន សែន បានថ្លែងថា បើកូនសម្តេចមិនល្អសម្តេចមិន​ឱ្យធ្វើ​​នាយករដ្ឋមន្ត្រីនោះឡើយ។សម្តេចមិនឱ្យគណបក្សប្រជាជន​កម្ពុ​ជា ត្រូវបំផ្លាញដោយដៃកូនរបស់សម្តេចនោះទេ។ សម្តេចតេជោ ហ៊ុន សែន បានថ្លែងថា នរណាក៏ដោយកុំមកនិយាយពីការបង្រួបបង្រួមជា​មួយក្រុមមនុស្ស ដែលប្រមាថភរិយា និងកូនរបស់សម្តេច។

សម្តេចតេជោ ហ៊ុន សែន បានថ្លែងអំណរគុណជប៉ុន ដែលបានគាំទ្រ​ដំ​ណើរសម្តេចទៅកាន់មីយ៉ាន់ម៉ា។ សម្តេចតេជោ ប្រកាសប្រឹងប្រែងសហ​ការ​ជាមួយអ្នកពាក់ព័ន្ធ ដើម្បីដោះស្រាយបញ្ហាមីយ៉ាន់ម៉ា។

សម្តេចតេជោ ហ៊ុន សែន បានថ្លែងថា ចេតនាចង់បំបាត់ភាគីយោធាមី​យ៉ាន់​ម៉ា ប្រៀបដូចយកក្បាលបោលទៅបុកជញ្ជាំង។ សម្តេចជឿជាក់ថា មិនអាចយកសង្គ្រាមទៅបញ្ចប់សង្គ្រាមបានឡើយ។ បញ្ហារបស់មីយ៉ាន់​ម៉ា​ត្រូវការ​ចរចា​ច្រើនដងទាំងលើតុ និងក្រោមតុ។

ខណៈនោះដែល សម្តេចតេជោ ហ៊ុន សែន បានថ្លែងថា កូនស្រីម្នាក់ និងចៅចំនួន៥នាក់ បានឆ្លងជំងឺកូវីដ១៩។ សម្តេចតេជោ ហ៊ុន សែន អំពាវនាវពលរដ្ឋក្នុងរាជធានីភ្នំពេញ ខិតខំប្រយុទ្ធប្រឆាំងនឹងជំងឺកូវីដ​១៩។ សម្តេចតេជោ ហ៊ុន សែន បានថ្លែងថា នៅថ្ងៃម្សិលមិញរកឃើញ​អ្នកឆ្លងមេរោគកូវីដ១៩ចំនួន ៥៩៨នាក់ និងមានអ្នកស្លាប់២នាក់។

សម្តេចតេជោ ហ៊ុន សែន អំពាវនាវឱ្យនាំកុមារអាយុចាប់ពី៣ឆ្នាំទៅ៥ឆ្នាំ ទៅចាក់វ៉ាក់សាំងបង្ការជំងឺកូវីដ១៩ ដែលចាប់ផ្តើមនៅថ្ងៃទី២៣ ខែកុម្ភៈ​នេះ។ ការយកឈ្នះជំងឺកូវីដ១៩ បានមិននៅតែលើរាជរដ្ឋាភិបាល ឬក្រ​សួងសុខាភិបាលនោះទេ គឺទាមទារឱ្យមានការចូលរួមពីប្រជាពល​រដ្ឋ​គ្រប់​រូប។ សម្តេចតេជោ ហ៊ុន សែន អំពាវនាវដល់ឱសថស្ថានកុំដំឡើង​ថ្លៃថ្នាំព្យាបាលជំងឺកូវីដ១៩ ពិសេសក្រសួងសុខាភិបាល ពិនិត្យកុំឱ្យ​មាន​ចរាចរណ៍ថ្នាំព្យាបាលកូវីដ១៩ក្លែងក្លាយ៕

https://kronglungvek.com.kh