រដ្ឋមន្រ្តីក្រសួងអភិវឌ្ឍន៍ជនបទ ប្រារព្ធពិធីបើកការដ្ឋានសាងសង់ផ្លូវលំ នៅស្រុកត្រាំកក់ ជាង១៣គី​ឡូ​ម៉ែត្រ

 ខេត្តតាកែវៈ

ដោយ៖ ហុង ចំណាប់

លោក អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ បានប្រារព្ធពិធីបើកការដ្ឋានសាងសង់ផ្លូវលំជនបទ ក្នុងគម្រោ​ង​សាច់ប្រាក់ពលកម្ម សម្រាប់អភិវឌ្ឍន៍ជនបទ និងគាំទ្រកសិករ កាលពីថ្ងៃទី១០ ខែមិថុនា ឆ្នាំ២០​២០ នៅ​ភូមិ​ព្រៃឈើទាល ឃុំតាភេម ស្រុកត្រាំកក់ ខេត្តតាកែវ។

ឯកឧត្ដម អ៊ូច ភា អភិបាលនៃគណៈអភិបាលខេត្តតាកែវ បានសម្ដែងការស្វាគមន៍ចំពោះវត្តមាន​គម្រោង​សាច់​ប្រាក់ពលកម្មសម្រាប់អភិវឌ្ឍន៍ជនបទ និងគាំទ្រកសិករ របស់ក្រសួងអភិវឌ្ឍន៍ជនបទ ក្នុងការស្ថាបនា​ផ្លូវដីស ដោយប្រើប្រាស់កម្លាំងពលកម្មរបស់បងប្អូនប្រជាពលរដ្ឋ។

នៅឆ្នាំ២០២០ ស្រុកត្រាំកក់នឹងទទួលបានផ្លូវដីក្នុងភូមិសប្រមាណជាង ១៣គីឡូម៉ែត្រ នៅក្នុងឃុំទាំង ៦ គឺ​ឃុំ​​តា​ភេម  ត្រពាំងធំខាងជើង   ត្រពាំងក្រញូង   ជាងទង   អូរសារាយ  និងឃុំសំរោង ។

លោករដ្ឋមន្ត្រី អ៊ុក រ៉ាប៊ុន​ បានវាយតម្លៃខ្ពស់ចំពោះសមិទ្ធផលជាច្រើន ដែលបានកើតមានឡើងក្នុងខេត្តតាកែវ ជាពិសេស គឺហេដ្ឋារចនាសម្ព័ន្ធមានផ្លូវជាតិលេខ៣ និងផ្លូវជាតិលេខ២ បង្ហាញពីការយកចិត្តទុកដាក់​របស់​ប្រមុខ​​រាជរដ្ឋាភិបាល ដែលមានសម្ដេចនាយករដ្ឋមន្រ្ដី ហ៊ុន សែន។ ក្រៅពីទទួលបានផ្លូវជាតិ សម្ដេចនាយក​រដ្ឋ​មន្រ្ដី​ ក៏បានគិតគូអំពីផ្លូវលំជនបទ ដែលផ្លូវនេះ មានសារសំខាន់ណាស់សម្រាប់តភ្ជាប់ ពីភូមិំយួយទៅភូមិមួយ ទៀត ងាយស្រួលដល់ប្រជាពលរដ្ឋ ក្នុងការធ្វើដំណើរឆ្លងកាត់ជាប្រចាំ។

លោករដ្ឋមន្ត្រី បានបន្តទៀតថា គម្រោងសាច់ប្រាក់ពលកម្មសម្រាប់អភិវឌ្ឍន៍ ហេដ្ឋារចនាសម្ព័ន្ធជនបទ និង​ការគាំទ្រកសិករ ជាគម្រោងដែលទទួលហិរញ្ញប្បទានផ្ទាល់ ពីរាជរដ្ឋាភិបាល ក្នុងគោលបំណងចូលរួម​កាត់​​បន្ថយភាពក្រីក្រនិងលើកកម្ពស់សុខមាលភាពរបស់ប្រជាពលរដ្ឋ ​ដែលធ្វើឡើងតាមរយៈផ្ដល់ឱកាស​ការងារ រយៈកម្មវិធីសាច់ប្រាក់ពលកម្មដែលជួយដោះស្រាយជីវភាពបន្ទាន់ដល់ប្រជាពលរដ្ឋជាពិសេសកម្មករកម្មកានី ដែលត្រូវបានព្យួរការងារតាមរោងចក្រដោយសារតែរងផលប៉ះពាល់ជំងឺកូវីដ ១៩។ ការងារ​ពល​​កម្ម​ដើម្បីស្ថាបនាផ្លូវដីស ជាគម្រោងរបស់រាជរដ្ឋាភិបាល ដើម្បីអភិវឌ្ឍន៍ហេដ្ឋារចនាសម្ព័ន្ធក្នុងភូមិ តែ​ការ​​ងារ ពលកម្មនេះមិនមែនជាការកំណែននោះទេ ជាការស្ម័គ្រចិត្ត។ ​ដោយឡែកការក្រាលក្រួសក្រហម​រាជ​រដ្ឋាភិ បាល នឹងប្រើប្រាស់គ្រឿងចក្រដើម្បីបង្ហាប់ប្រកបដោយគុណភាព។

លោករដ្ឋមន្រ្ដី បានរំលឹក ​ឲ្យប្រជាពលរដ្ឋ ចូលរួមជាមួយរាជរដ្ឋាភិបាល​ ដើម្បីទទួលបានផ្លូវប្រើប្រាស់​ក្នុង​ភូមិ​ផង និងទទួលបានកម្រៃសម្រាប់ទ្រទ្រង់ជីវភាពផង ដោយតម្លៃក្នុង១ម៉ែត្រត្រីគុណទទួលបានថវិកា ១២០ ០០រៀល និងការដាំស្មៅតាមជើងទេរក្នុង១ ម៉ែត្រការ៉េទទួលបាន ៣០០០រៀល។

ឯករដ្ឋមន្រ្ដីក្រសួងអភិវឌ្ឍន៍ជនបទ បានរំលឹក ឲ្យប្រជាពលរដ្ឋចូលរួមទប់ស្កាត់ ការរីករាលដាលជំងឺកូវីដ ១៩ ដោយឧស្សាហ៍ដុសលាងសម្អាតដៃជាមួយសាប៊ូជែល ឬអាល់កុល ពាក់ម៉ាស់ និងរក្សាគម្លាតតាមការ​ណែនាំ​របស់ក្រសួងសុខាភិបាល។

គណៈប្រតិភូបានអញ្ជើញទៅពិនិត្យមើលសកម្មភាពស្ថាបនាផ្លូវដីសរបស់ប្រជាពលរដ្ឋនៅភូមិព្រៃឈើទាល ឃុំតាភេម ស្រុកត្រាំកក់ ខេត្តតាកែវ។ គម្រោងសាច់ប្រាក់ពលកម្មសម្រាប់​អភិវឌ្ឍន៍ជនបទ និងគាំទ្រកសិករ​ បានអនុវត្តនៅក្នុខេត្តគោលដៅចំនួន១៧ គឺខេត្តកំពង់ឆ្នាំង កំពង់ធំ កំពង់ស្ពឺ តាកែវ បាត់ដំបង ពោធិ៍សាត់ ព្រៃវែង សៀមរាប ស្វាយរៀង ឧត្ដរមានជ័យ កណ្ដាល បន្ទាយមានជ័យ កំពត ក្រចេះ ស្ទឹងត្រែង ត្បូងឃ្មុំ និង​ខេត្ត​ព្រះវិហារ៕