កោះទ្រង់ ទទួលបានពានរង្វាន់ជ័យលាភី ជាសហគមន៍​ទេសចរណ៍គម្រូ នៅភូមិភាគឥសាន

ខេត្តក្រចេះ

ដោយ៖ សេង ស៊ីដារ៉ូ

រមណីយដ្ឋានទេសចរណ៍ធម្មជាតិកោះទ្រង់ គឺជាសហគមន៍​ទេសចរណ៍ ​ដែលលេចធ្លោរជាងគេ

​ក្នុង​ខេត្តក្រចេះ ហើយសហគមន៍មួយនេះ ក៍​ទទួលបានពានជ័យលាភី ជាសហគមន៍ទេសចរណ៍​គម្រូ​ នៅឆ្នាំ២០១៩។

លោក ប៊ុន បាន ប្រធានសហគមន៍ទេសចរណ៍ធម្មជាតិកោះទ្រង់ ខេត្តក្រចេះ បានឲ្យដឹងថា ពាន 

រង្វាន់​​ជ័យលាភីនេះ ទទួលបានពីសម្តេចក្រឡាហោម ស ខេង នាចុងឆ្នាំ២០១៩។ មូលហេតុ​ដោយ​​​សារ សហគមន៍មួយនេះ​ បានប្រឹងប្រែងយ៉ាងខ្លាំង ក្នុងការបង្កើតឡើងនូវសេវាកម្មថ្មីៗ​ដែល​​មានឈ្មោះថា ​កោះផ្តើមស្នេហ៍ មួយ​​កន្លែងទៀត ​ នៅលើកោះទ្រង់នេះតែម្តង។​ ហើយធ្វើ​ឲ្យ​រមណីយដ្ឋានមួយនេះ កាន់តែទាក់ទាញភ្ញៀវជាតិ និងអន្តរជាតិ មកកម្សាន្តលើកោះទ្រង់នេះ​ ច្រើន​បន្ថែម។

​លោក ប៊ុន បាន បានលើកឡើងទៀតថា ក្នុងឪកាសចូលឆ្នាំសកល  ចូលឆ្នាំចិន ​និងសិទ្ធិនារី​៨មីនា

មានភ្ញៀវទេសចរណ៍ ជាង៣ម៉ឺននាក់ ចូលមកកំសាន្តនៅលើកោះទ្រង់នេះ។ ​ មិនត្រឹម​ប៉ុណ្ណោះ​ កោះទ្រង់ បានបង្កើតឡើងនូវផ្ទះសំណាក់​ និងសេវាកម្មផ្សេងៗទៀត​ ដើម្បីជួយផ្តល់មុខ​របរ​ដល់​សមាជិកសហគមន៍ ឲ្យមានជីវភាពធូរធារ និងមានការបង្កើតកម្មវិធីដាំបន្លែ ដោយឲ្យ​ភ្ញៀវចូលរួមដាំទាំងបន្លែ និងដាំដើមឈើ ទុកជាអនុស្សាវរីយ៍ ​នៅពេលពួកគេចាកចេញទៅវិញ​ ឬ ត្រឡប់មកកំសាន្តនៅលើកោះទ្រង់វិញ ដើម្បីមើលដើមឈើរបស់ពួកគេបានដាំ។

ដោយសារពីភាពរីករើនទាំងនេះ ទើបមន្ទីរទេសចរណ៍ខេត្ត បានធ្វើរបាយការណ៍ស្នើទៅ​ថ្នាក់​ជាតិ

​ដើម្បីឲ្យសហគមន៍ទេសចរណ៍ធម្មជាតិកោះទ្រង់ ទទួលបានពានរង្វាន់ជ័យលាភី ជាសហគមន៍​ទេសចរណ៍គម្រូ នៅភូមិភាគឥសាន៕