កីឡាសីស្លាប មានប្រវត្តិតាំងពីសម័យ ឃុនឆាង ឃុនផែន
ភ្នំពេញៈ
ដោយ៖ សេង ស៊ីដារ៉ូ
កីឡាសីស្លាប ជាប្រភេទសិល្បៈបែបកីឡាមួយ
ដែលចាស់ៗជំនាន់មុន ច្រើនជុំគ្នាទាត់សីស្លាបនេះសប្បាយ ដែលធ្វើឲ្យរាងកាយយើងមាំមួន
និងទទួលបានសុខភាពល្អប្រសើរ ហើយកីឡាទាត់សីស្លាប ប្រភេទនេះ គេសង្កេតឃើញមាននៅតាមទីសាធារណៈ។
លោក សុខ ឬទ្ធី
អ្នកជំនាញខាងទាត់សីស្លាប់នេះ បានឲ្យដឹងថា ប្រវត្តិសីស្លាបខ្មែរយើង មានតាំងពីយូរលង់មកហើយ
និងមានការទាក់ទិនទៅនឹងប្រវត្តិរឿង ឃុន ឆាង ឃុន ផែន ដូចមានចេតីយ៍ជាភស្តុតាងស្រាប់ នៅលើទឹកដីកោះកុងយើងនេះ។
ការពាក់ព័ន្ធទៅនឹងសីស្លាបនេះ គឺវាមានក្បួនខ្នាត នៃការទាត់ សីស្លាបនេះ ហើយក្បាច់ក៏មានច្រើនបែបតាមរយៈការទាត់
គឺមានពីខាងមុខ ខាងក្រោយ ខាងមុខចំដោយ ប្រើកែងជើង ក៏អាចទាត់សីស្លាបនេះចំគោលដៅ
ឥតល្អៀង ព្រោះអ្នកទាត់មានភាពស្ទាត់ជំនាញ ដោយគ្មានអ្វីខុសគោលដៅនោះឡើយ។
ក្រុមទាត់សីស្លាបរបស់លោកឬទ្ធី
ក៏ធ្លាប់បានទៅលេងប្រកួត ក្នុងប្រទេសវៀតណាម ហើយប្រជាជនវៀតណាម ចូលចិត្តលេងទាត់សីស្លាបនេះដូចគ្នាដែរ
និងក៏បានចូលរួមលេងជាមិត្តភាពជាមួយគ្នាទៀតផង។
ការទាត់សីស្លាបនេះ ត្រូវលេងជាក្រុមចាប់ពី៤ទៅ៦នាក់
ទៅតាមវង់តូច ឬវង់ធំ ហើយការបង្កើតជាក្រុម ឬជាក្លឹបទើបអាចហ្វឹកហាត់បានល្អប្រសើរ។
បច្ចុប្បន្ននេះ កីឡាសីស្លាប
គឺទទួលបានការហ្វឹកហាត់ពីបុគ្គលម្នាក់ទៅបុគ្គលម្នាក់ទៀតប៉ុណ្ណោះ ឬទទួលការហ្វឹកហាត់ពីចាស់ៗ
ដែលគាត់ឧស្សាហ៍ទាត់លេងតាមវាលទីសាធារណៈ។
រហូតមកដល់ពេលនេះ ប្រភេទកីឡានេះ
ក៏មានការចូលរួមនៅក្នុងព្រឹត្តិការណ៍កីឡាធំៗ ដូចជានៅក្នុងមហាសង្ក្រានឆ្នាំថ្មី ជារៀងរាល់ឆ្នាំផងដែរ៕
Post a Comment