លោក សេង សាប៊ុន គឺជាជាងចម្លាក់ថ្មភក់ ដ៏ល្បីនាពេលបច្ចុប្បន្ន ដែលជាកេរ្តិ៍មរតក បានបន្សល់ទុក​ពីមនុស្ស​ជំនាន់មុន

ខេត្តកំពង់ធំៈ

ដោយ៖ ឌឹម គឹមហាក់

ជាងចម្លាក់ថ្មភក់សម័យថ្មី បានកំពុងបង្ហាញស្នាដៃចម្លាក់ ដែលខ្លួនបានរៀនសូត្របន្តវេន ពីមនុស្សជំនាន់មុន​ដែលធ្វើឲ្យស្នាដៃចម្លាក់នេះ មានភាពរស់រវើក និងល្បីល្បាញ ទើបធ្វើឲ្យទាក់ទាញ អតិថិជន មានការកម្ម៉ង់យក​ទៅ​​ប្រើប្រាស់ច្រើន។

លោក សេង សាប៊ុន មានមុខរបរជាងចម្លាក់រូបព្រះ ក្នុងស្រុកសន្ទុក ខេត្តកំពង់ធំ បានឲ្យដឹងថា របរចម្លាក់​ព្រះនេះ មានរយៈពេក៥ឆ្នាំមកហើយ ដោយចេះពីឪពុកខ្លះ និងចេះមកពីអ្នកជំនាញ មកបង្ហាត់ខ្លះផងដែរ ​ទើប​ធ្វើឲ្យមុខរបរនេះ បានកាក់កបចេះតែទៅមុខជាលំដាប់។ លោក សាប៊ុន បានបន្ថែមទៀតថា ក្នុងការឆ្លាក់ព្រះ មានការពិបាកច្រើន ដោយសារផលប៉ះពាល់ហុយ ដោយសារធូលីកំទេចថ្មរាល់ថ្ងៃ ហើយតាមរូបសណ្ឋាន មាន​សភាពធំៗ ត្រូវប្រើពេលវេលាយូរខែ ទើបសម្រេចផល។ វត្ថុដើមនៃថ្មភក់ គឺនាំចូលមកពីខេត្តព្រះវិហា។

ដោយសារពីមុន អ្នកចម្លាក់ភាគច្រើន យកតែថ្មដាពីភ្នំសន្ទុក យកមកឆ្លាក់ តែក្រោយមករដ្ឋត្រូវបានបិតហាម​ឃាត់ មិនឲ្យយកប្រភេទថ្មភ្នំសន្ទុកនេះទៀតទេ ម្លោះហើយត្រូវទិញនាំចូលមក ពីខេត្តព្រះវិហារវិញ។
អតិថិជន​ដែលកម្ម៉ងជាវរូបព្រះ ជាស្នាដៃរបស់ខ្មែរ ភាគច្រើនមកពី២៥ រាជធានី ខេត្ត ក្រុង ហើយរូបដែលធំ​ពិបាក​​ជាងគេ គឺរូបចម្លាក់បល័ង្គពេជ្រ ដែលមានតម្លៃរហូតដល់ ២០០០០ដុល្លារ ហើយរូបបន្ទាប់មានរូប ត្របក​ឈូកអង្គរ ការបំបែក ត្រូវប្រើពេលវេលាចម្លាក់៤ខែឡើង។ ដោយឡែកចំពោះរូបតូចមានតម្លៃពី ៣០០-៤០០​ដុល្លារ៕