រដ្ឋសភាទទួលយកសំណើសេចក្តីព្រាងច្បាប់របស់រាជរដ្ឋាភិបាល ស្តីពី សុវត្ថិភាពម្ហូបអាហារ និងច្បាប់ស្តីពីវិសោធនកម្មមាត្រា១៤០ នៃច្បាប់ ស្តីពីការគ្រប់គ្រងរដ្ឋបាល រាជធានី ខេត្ត ក្រុង ខណ្ឌ

ភ្នំពេញ

ដោយៈ សេង ស៊ីដារ៉ូ

សម្តេចអគ្គមហាពញាចក្រី ហេង សំរិន ប្រធានរដ្ឋសភា បានដឹកនាំកិច្ច ប្រជុំគណៈកម្មាធិការ អចិន្រ្តៃយ៍រដ្ឋសភា ដើម្បីអនុម័តទទួលយក​សេចក្តី​ព្រាងច្បាប់ចំនួនពីរ ដែលជាសំណើរបស់រាជរដ្ឋាភិបាល មកប្រគល់ជូន​គណៈកម្មការជំនាញរដ្ឋសភាដើម្បីពិនិត្យ និងសិក្សា កាលពីថ្ងៃទី១២ 

ខែមេសា ឆ្នាំ២០២២។

សេចក្តីព្រាងច្បាប់ដែលរដ្ឋសភាទទួលយកមកពិនិត្យសិក្សានេះ មាន​សេចក្តីព្រាងច្បាប់ស្តីពីសុវត្ថិភាពម្ហូបអាហារ និងសេចក្តីសេចក្តីព្រាង​ច្បាប់ស្តីពីវិសោធនកម្មមាត្រា១៤០ នៃច្បាប់ស្តីពីការគ្រប់គ្រងរដ្ឋបាល រាជធានី ខេត្ត ក្រុង ខណ្ឌ ដែលត្រូវប្រកាសឲ្យប្រើដោយព្រះ​រាជក្រម​លេខ នស/រកម/០៥០៨/០១៧ ចុះថ្ងៃទី២៤ ខែឧសភា ឆ្នាំ២០០៨។

សម្តេចអគ្គមហាពញាចក្រី ហេង សំរិន ក៍បានស្នើឲ្យអគ្គលេខាធិការ​ដ្ឋាន​រដ្ឋសភា និងស្ថាប័នពាក់ព័ន្ធសហការរៀបចំទទួលបដិសណ្ឋារកិច្ច ដំណើរទស្សនកិច្ចផ្លូវការ និងមិត្តភាពរបស់ឯកឧត្តម Om Birla ប្រធាន​សភា​ជាន់ទាបនៃសាធារណរដ្ឋឥណ្ឌា (Lok Sabha) ដែល នឹងអញ្ជើញ​មកបំពេញទស្សនកិច្ច នៅព្រះរាជាណាចក្រកម្ពុជាពីថ្ងៃទី២១​ដល់ថ្ងៃ​ទី២៤ ខែមេសា នេះផងដែរ៕

https://kronglungvek.com.kh